Zeitindah Na Tuanbia Na Ttial Ve Lai?

Tuanbia vun ti ahcun a rak si cangmi hlan lio i a rak cangmi khi va si sehlaw a lo. Tuanbia tampi cu a si ko e, a hlan Kong an chim khi si ko. Asinain tuanbia kip hi a hman mi a si tinak si lo. Tuanbia cu mi pakhat nih a tong taktak mi a ttialmi a si kho, a ton theng lo zong ah a saduhthah, "rak si seh" ti a duhmi kong zong a si kho. A si lo ah a ruahnak "imagination" zong khi si kho. A tawi nakin cun Tuanbia cu mi pakhat nih a tonmi, a phuahmi/a ttialmi khi a hei si ko.

 

Tuanbia cu a ho poah nih ttial khawh a si. Cawnnak sang a ngeimi theng, tonmi "experience" a ngei deuhmi lawng nih ttial a si lo pin ah Tuanbia cu upa deuh hngakchia deuh tiah biakhiahnak zei a ngei lo. Nangmah zong nih na ttial khawh i keimah zong nih ka hei ttial ve ko hnga. Cun Tuanbia a ttialtu nihcun a Tuanbia cu a duh ningte in donghnak a ser khawh. A ttial tikah a Minta pawl cung ah aa hngat. A cangtu pawl canmi "characters" cu amah a duh ningte in si ko hnga. Catang sangpi maw si lai, tha zaang lei ah a Tthawng tukmi maw si lai? Ngakttah maw si lai? Aa dawh lai maw a mui achia lai dah. Mi rum maw si lai mi sifakmi dah? Tuan ah maw a thih lai silo le zungzal ca nuamte in tiin dah a donghter lai amah nawl a si dih. Tuanbia pakhat i cangtu pawl cu a ttialtu pa "creator" i ser chom " creation" khi a si ko. Tuanbia chung i cangtu pawl caah cun a ttialtu pa cu an Pathian si ko an nunnak le thihnak cu T-tialtu pa kut ah a um. Tuanbia "story" cu kan duh ningin kan ttial khawh. Kan ser khawh, a fawite vun ti ko usih.!

 

Sinain nangmah nih na Tuanbia cu na ttial kho hnga maw? Kan Tuanbia hi zei ruangah dah kanmah nih kan ser/ttial lo? A ruang cu kanmah kan Tuanbia ahcun kanmah nawl ngeitu kan si kho lo, kan ttial kho lo ziah tiah cun a ra lai ding kan theih lo pin ah thil hi kan duhning le kan saduhthahte in zeitik hmanh ah a kal bel lai lo. Kan Tuanbia hi kanmah nih rak ttial khawh si sehlaw zeitluk in dah a tthat hnga. Ngeihchiatnak le lungfahnak, lungretheihnak le ttahnak, thihnak le i tthennak vialte cung ah nawl kan ngei hnga i nun cu a fawi ngai te ko hnga. Ngaihchih ding cu kan tuah hnga lo i lungfah i tuar cu a um hnga lo. Kan lung a kan fahtertu, a kan daw ngai bantuk le a kan ruat ngai bantuk in i umter i kan hnu lei in thah a kan timtu, zeitik ah dah a rilh lai tiah seh in a kan bawhtu, sifah lio i zeirel lo in kan si khawh deuh hnu lawng ah ka nau/ka u tiah rak zuanhnawh tthan hmang mi pawl cung ah cun nawl ka ngeih dih hnga i bomb va puah hnawh hna le meithal in tlanglak in kahnak nawl cu ka kut ah um dih hnga i kaa lung hmuih ngai ko hnga. Asinain kan duhning le kan tonmi cu aa khat bel lo cu ta!!!

 

Cu ruang ahcun ka miphun le ka hawile pawl Na Tuanbia cung ah nawl na ngeih lo ruang ah zei tik hmanh ah ralringte in um hna u sih!  A ra lai ding le a si lai ding kan theihcia lo pin ah kan tuah dingmi nih zeidah a chuahpi lai tihi fiang deuhte in theihnak ngeih i zuam hna usih. Zeitik caan paoh ah ralram ah kal kho cawlh ding le a teitu "winner" si ding in i ready cia hna usih. Mi kong ceih hi huam/duh hna hlah usih! Zeitik ah dah zeitin Na si lai Na chimcia kho lo khah! A phaw (a langhnak) lawng in bia khiak hna hlah usih. An sualnak pakhat hnih ruang ah kan mit-au i dang hlah seh. Nangmah kha vun i zoh law Khua ruat hmasa hna usih.

 

Hi vawlei ahhin a tlamtling mi kan um lo. Kan thazaang dernak (tlamtlinlonak) aa khah lemlo sawhsawh khi si ko. Kan pawcawmnak le cawnsannak cio ah kan buaituk ruang ah dawtnak hi zawr hram hlah seh! An dawtu cu va daw law an huatu ruang ah na lungre thei hlah seh. Na ngeihmi thilte ahkhan lawmhzia thiam law daw cikcek ko. Na Chungkhar cu dawtzia thiam i zuam. Na thaizing kong na chim kho lo khah!! Na Tuanbia cu nangmah nih Na ttial khawh lai lo caah a ttialtu le a reltu caah aa dawhmi, rel nuammi a si khawh naklai izuam ko hna usih. A zei bantuk vanchiatnak le lungdonghnak na ton zong ah an dawtu caah mirh peng khawh i zuam hna usih. Kan palhnak pin ah hmailei kal kho loin um hna hlah usih...cawnnak ah hmang ko. Sinain na palhnak kha nolh ti lai cih!! Ticun Na Tuanbia cu hmailei na Tu le Fa caah tahchunh awktlak ah a cang ko lai. By; Deborah Hrang Nawl