Riaklang Va Tuanbia

Riaklang vate hi vanzuang phunkhat a rak si ko nain a hawi le hi minung mi hna nih an cinmi thlairawl, fangvui hna fir an hman caah minung nih an huattuk hna caah, cubantuk in mifir si cu a duh lo. Cucaah a hawi le nih an huat I an hlawtmi a si an ti. Cu lawng siloin a chungin a chuakmi a eek hmanh hi ai phundang deuhmi a si. Va phun tling nih fir hau lo tein tlanh ding thei le tizu par an hmuhkhawhnak hnga caah a eek in rirang kungpi a kheu caah a hawi le nih an hlawtnak a si i dawtu ngei lomi a si caah lungleng umhar in dawtnak riahruun kawl in a vaimi vate a si.

 

Riaklang vate hi a riahnak hmun paoh ahhin zinglei a thawh lai paoh ah a ek a ek ta i cu a ek te cu riraang in a kheu i cu riraang nihcun a riahnak thingkung hlun a ngerh a ngerh i thingkung hlun cu a thi i riraang kungpi in a kheu tawn. Cu tikah riraang kungpi thladem tangah cun mi vialte nih dornak ah an hman tawn i tizu par tlan va phuntling hna nih a kung cungah zaihla sa in an awn tawn i an i nuam tuk tawn. Cu tlukin  rawltammi va phuntling nih lawmhnak an hmuhnak riraang kungpi chuak hmanh sehlaw, nunhlun hlawt a siang lomi, thingkung pawl nihcun riaklang vacu riahnak run inn an sianh tawn lo i riahnak kawl in a vaih tawnnak a si.

 

Voikhat cu dornak riahruun kawl a vai lengmang i ~hilkung pi kha a va ton i zaangfahnak tein  na nge te ah tuzan te cu ka riak ta ko lai. Ka zaang a ba tuk cang eee.. tiah a nawl len nain, `hilkung pi nihcun thih lai ai sian lo caah riahnak ruun a awnh  duh lo. A vang kal deuh than i Buihnam kung te kha  a va ton i riahnak nawl a hal than nain a rak sianh ve lo. Cu hnu ah Fahia kung pi sinah cun a vang kal than i riahnak ruun inn cu a nawl than nain a sianh ve thiamthiam lo i a kui tak diam. Cuticun thing tha ai ruati a thinglung put tlang a sangmi paoh nih cun riahnak an sianh lo i an rak donh dih. Asinain lungdong lo tein riahruun cu a kawl than i zinglei khuadei lai teah khiangkungpi a va ton i cu khiangkung pi cu zaangfahnak tein khua a dei dengmang ko cang riahruun kawl in ka vaihnak ah ka ba tuk cang i ka zaangfah ko law, na nge te ah rak riak ko ning tiah a nawl caah Khiangkung pi nihcun a zaang a fak tuk caah a nunhlun holh ding a si ko zongah a poi lo a ti i a riahter. A nge te i a van i fut bak ah khua a dei colh i riak manh loin a ek a ek ta i a zuang colh. Cucaah riaklang va an tinak a si.

 

Cu ti i Khiangkung pi cungah a ek a ek tami cu Riraang in a hung kheu i cu riraang nihcun Khiangkung pi cu a zelh a zelh i Khiangkungpi a thi ruangmang i Riraang kungpi in a hung kheu. Cucaah a cung ahcun theitlan vaa phuntling hna cu lunglawmhnak zaihla sak pah in thei cu an tlan i nuam an i hringhren. Khiangkung cu a nun hlun ah a par zong tizu a ngeih lo caah tizu partlan tu mizeihmanh an tlanh duh lo i, a thei zong ei awk a that lo caah theitlan va pawl zong nih an tlanh duh lomi a si. A kung zong a mawi tuk caah mi nih an tongh duh lomi thingkung a sinain a nunhlun kha hloh a sian caah mi vialte nih tlanh khawhmi Riraang kung a cannak a si.

 

Kan Bawipa Jesuh Khrih zong van sunparnak kaltak in vawlei ah a ra i hrinnak caah Bethlehem khua khual riahnak buuk ahkhan hmun khat hnu hmun khat ah riahnak an kawl nain sining sang iah vawlei mi in hmuh mi pawl caah khan chiah dih caah riahruun a tong lo. Cucaah Bethlehem cawrawleinak kungah hrin a si i caw inn ah an riahnak a si. Bethlehem cawrawl kuang cu nauta ko hmanh sehlaw, a nunnak a lawnter i Jesuh hrinnak caah a nun a  lawnter i mi vialte khamhtu chuaknak ah a cang i a min chim dai lo a sinak a si. Cucaah Riaklaang va le kan Bawipa Jesuh hi an dir hmun ai khat mi an si. Riahruun kawl in a vaimi an si i an nih riahnak cu mi vialte khimnak le khamhnak lunglawmhnak a chuahtertu an si.

By; Sui Minh