Vawleicung ram dihlak nih cuanhmi le lungthin pek mi US rampi thimnak cu Nihin November 3 ah an tuah cang lai. Ram lianngan le ramtthawng, US President thimnak hi US ram ca lawng a si lo. Vawleicung ram vialte caah a biapi mi a si caah vawleipi nih an cuanh cionak a si. Laimi tiangin a kan huapchih caah Laimi zong nih kan thinlung ah a um ngai ve. Cucaah a tawinak tein langhter ka van izuam lai.
US political system hi
party ngan pahnih, Republican party le Democratic party tangah an um. Phun
dang in chim ahcun party fate te an tampi ko nain a donghnak ahcun hi party
pahnih ah an ifun kan ti lai. Hi party pahnih chungin thimmi candidate veve kha
President caah thimmi cu an si. Cu hlan i US President a rak ttuan ciami vialte
zong hi Party pahnih chung in thimmi kha an si tawn.
Republican Party, Grand
Old Party (GOP) tiah an chim tawnmi hi Conservative Political party tiah auh an
si. Tukum ah an party Presidential Candidate cu US President a ttuan cuahmah
liomi Donald Trump a si. Rural America ah dirkamhtu tampi a ngeimi pa a si.
Democrats hi liberal
political party tiah auh an si. An presidential candidate Joe Biden hi kum 8
chung President hlun Barack Obama chan
lio ah Vice President dirhmun a rak ttuan cangmi a si ve. Democratic Party hi
Urban America ah ttanhtu le dirkamhtu tampi an ngei ve Tukum Presidential
Candidate hna hi Kum 70 cung minung veve an si. Trump hi Kum 74 a si i, Biden
hi Kum 77 a si cang. President hi Electoral College Vote hmangin thim a si lai.
Electoral
college: US President thimtu, Electoral college-ahhin vote
538 a um. Cucaah teitu si khawhnak ding ah Vote 270 hmuh a hau. Electoral College
an ngeih khawhmi zat hi state kip nih vote
an neihmi zoh in sermi a si. Phun dangin chim ahcun mipi tam deuhnak paoh
Electoral College vote tam deuh an ngei ti khawh zong a si.
Mipi nihhin President
thimnak ding ah vote cu an thlak ve tthiam ko. Nain mipi vote, Popular vote
tiah auhmi vote tam deuh a hmumi paoh kha President an tling tinak a si hlei
lo. Mipi vote in a tammi zong kha President tlin lo khawh a si tthiamtthiam.
2016 ithimnak ahkhan Democrats Hillary Clinton cu zuamcawhtu Republican Party
Donald Trump nakin popular vote ah tam deuh a hmu. Nain Trump nih Electoral
College ah vote tam deuh a hmuh ve caah US President caah thim a si. Phun dang
in kan chim ahcun Electoral College vote kha president thimtu taktak vote cu a
si.
Winner-takes-all
rule: State tam deuh ahcun winner-takes-all rule hman a
si i, hi a sullam cu popular vote ah mark tambik a hmumi cu candidate caah
State Electoral College vote pek viar an si.
State zeimawzat ahcun
party a tthawng deuhmi kan theih khawh bang nain State cheukhat ahcun a tthawng
dingmi, teitu si dingmi theih khawh a si ve hoi lo. A ruang cu Battleground
state timi a um. Hi sate hna hi Swing
state tiah auh an si. Democrats le Republicans an itei veve lengmang nak a si.
Phun dang in kan chim ahcun khuachel ah Democrats nih a tei i, khuachel ah
republican nih a tei ve. Cuti zungzal ttanhmi party a ngei lomi State kha Swing
state tiah auhmi cu an si.
Battleground state a si
pengmi ahhin Florida le Ohio hi an itel ve. Hlan ahcun Republican lei pawl tthawnnak
a si tawn. Arizona le Texas hna hi Democratic Party ttanhtu an karh ngai caah
tukum ahcun battleground state ah rel chih an si ve.
A hodah Vote a thla
kho? US rammi a simi paoh, refugee zong citizens a ngah hnu ahcun kum 18 a tlingmi paoh nih kum li
dan ah vote thlak khawh a si. Hi lio ahhin vote thlak duh lo le huam lomi an
tampi lengmang ve. Kum 2016 ithimnak ahkhan vote ngeimi million 245 an um lio
ah vote thlatu hi million 140 lawng an si. Million 110 nih vote an thla lo
tinak a si.
US Census
Bureau nih mi tampi nihcun Politics lei an thinlung an pe lo. Vote thla ding
zongin register an tuah huam lo, register a tuah cangmi chung zongah candidate
a tlingmi an duh hna lo ahcun vote thlak an huam lo tiah an langhter.
Result
Phuan Caan: Vote thlatu vialte nih an thlakmi rel
viar ding ahcun caan zeimawzat a rau. Nain President thimthar mi cu Electoral
College vote ah ai hngat ruangah vote thlak thaizing ah theih khawh colh a si
tawn. Kum 2016 thimnak ahkhan Donald Trump nih thimnak thaizing suimilam 3 ah
victory speech a ngei manh.
Tukum thimnak ahhin
postal ballot hmangin vote thlami an tam ruangah official result hi kan theih a
tlai deuh kho men. Polling station ah vote va thlak siseh, postal ballot
hmangin vote thla siseh an cohlan viar. Tukum hi zawtnak a um ruangah voidang
nakin postal ballot a hmangtu hi an tam deuh. Kum 2000 lio ithimnak ahkhan
result kan theih kha rak tlai deuh.
Supreme Court pawl an rak i rawlh hnu lawngah vote result kha a hung fiang.
Hi thimnak ahhin
Republican candidate George W Bush le Democratic candidate Al Gore an rak izuam
i an vote hmuh zat kha an rak itluk thulthal. Florida result ah an rak i hngat
ruangah vote rel nolh kha an rak halnak a si. Nain Supreme Court an hung irawlh
i, Florida Electoral College vote 25 cu Bush an pek viar. Bush nihhin vote 271
a hmuh i a tling cangcang a si. Al Gore nihhin Popular vote a hmuhmi a rak tam
deuh nain president a rak tling lo.
President Thar Lakluh
Caan: President thar hi kumthar January 20 (Pathian ni a si ahcun January 21)
ah Washington DC ah Capitol Building ah lakluh a si tawn. Lakluhnak programe an
hman dih in President thar nih White House ah Official in a tthu colh.
President thar lakluh hlan ahhin Vice President cu biakamnak an tuahter hmasa i
lakluh hmasa a si tawn. A hnu ah President thar hi lakluh cu a si. Lakluhnak
Programme hi Joint Congressional Committee on Inaugural Ceremonies (JCCIC) nih
an tawlrel tawn.
President thar nihhin
Bile a kut ah iken in biakamnak an tuah tawn. Hi lio ahhin US President lakah
Biakamnak tuah lio ah Bible a hmang lomi le ai ken lomi pathum an um cang. Theodore
Roosevelt chuan Bible nih a rak hmang lo. John Quincy Adam nih Law cauk chungah
a kut a rak hngat ve. Lydon B Johnson nih Roman Catholic Missal (Mass caah an
hman tawnmi) a hman ve fawn. Tutan ah Biden hi chuak sehlaw, Bible iken in
Pathian bia in biakamnak a tuah ve te hnga dek
maw?
By; Stalin Tha Cung
Lian
November 03,2020
No comments:
Post a Comment