Harnak Caan Ah Zohchun Awktlak Zumtu

Harnak Caan Kan Um Lio Ah Kan Ruah Ding Mi Phun (5)-Harnak chung kan um lio caan ahhin kan ruah ttheo tawn mi cu ziah Bawipa na ka daw lo maw? timi Pathian mawhchiatnak lungthin ngeih hi a fawite. Tei khawh lo dingmi ralhmai ah kan phak fatinte hi kan thinlung a chuak ttheo tawnmi cu ziah! Bawipa harnak lakah na ka chiah, ziah Bawipa kan bochan ko ttung, Zumhtlak zong ka si ko ttung, na hmai ahhin thla zong ka cam tawn ko ttung, zei ah na ka relpiak lo maw? Ziah ka ton cuahmah mi harnak chungin na ka chanh lo, na ka remhpiak lo, ziah na ka sersiampiak lo, na ka teipiak lo, Bawipa kan harnak hi na thei lo maw tiah Pathian hi kan harnak a thei rua lo tiah mawhchiat sual hi a fawite.

Cutik ziah Bawipa na um ko ahcun ka tuar awk a si ttung lo timi nun hi Satan aw a si ti kha tuzan ahhin langhter ka duh. Kan harnak chungah ziah Bawipa na um lo maw? Ziah ka ton awk a si ttung lo timi kanmah le kanmah kan ichimh pengmi, kan ruah pengmi khuaruahning hi Satan sin in a rami a si ti kha langhter ka duh. Hi ti Pathian amawhchiat mi thlau nakin a tu caan ah kan herhmi cu vel in a khatmi thlarau tu kan ngeih a biapituk. Jesuh bantuk nun in kan tthan ding le Bawipa sinah bawmh hal caan tu a si.

 

Jesuh khrih nun ah fiangte in kan hmuhmi cu vailam cung ah tlaih i thah a si lai zaan ah thla a cam i a lungre a thei ti kha fiangte in kan hmuh khawh. Ka lungre a theituk a ti. Cu tikah Pathian ah ka PA hi hrai hin ka luatter ko a ti. Sihmanhsehlaw, Jesuh nih fiangte in a hngalhmi cu a ttihmi harnak chungin khan luatter dingah Bawipa kha a hal lo i hi Bawipa nih ka cung i a tluntermi harnak nihhin hmuitinh a ngeih i cucu, cu hmuitinh chungin cun mi vialte luatnak ding caah vailamtah lam cungah kal ding ka si ti kha fiangte in a hngalh caah a harnak luatnak ding caah thlacam loin Bawipa na duhnak bang si ko seh a ti. Cucu vel in a khatmi nun a si.

A tu bantuk in kan lungre a theih caan zong ahhin Bawipa sin in bia kanmah le kanmah bia kan iruah peng dingmi cu Bawipa nih hi chungin zeidah a duhmi a um ti hi ralrin kan ipek lengmang i cu Bawipa duhmi a kawlmi thlarau kan ngeih khawhnak ding zong cu thla kan cam  aherh. Cu caah cun harnak kan ton lio caan ah vel in a khatmi nun ngei loin Satan sin in a ra mi AW, ziah hi harnak hi ka ton timi Bawipa mawhchiat nun kan ngeih sual a si ahcun Pathian sin ah ngaihthiam hal caan a si.

Cu caah cun kanmah le kanmah hi harnak chung i kan um lio caan ah hin bia kan iruah tikah kan thinlung nih kan thluak hi bia a ruahmi pawl hi a hmanmi bia a si kha a biapi tuk. A hman lomi bia pawl kha kan khuaruahnak nih kan thluak kha a pek lengmang a si ahcun tukforhnak chung ah a lotlau dingmi le Pathian a mawhchiatmi zumtu si zong hi a fawite. Cucaah cun tuzan ahhin pa nga tein a tu bantuk harnak kan ton lio caan ahhin kanmah le kanmah hi bia kan iruah dingmi le kan itheihter tthan lengmang dingmi thil panga tein ka van langhter ta lai;

1.Atu bantuk caan ahhin kanmah le kanmah kan iruah peng a haumi bia biatak pakhatnak cu, Pathian nih a kan dawtnak kong hi a si. Pathian a kan dawtnak ruat peng in philh dingmi kan si. Pathian nih a fapa Jesuh khrih kha zeitluk in dah a dawt ti kha Bible chung ah fiangte in kan hmuh. Kan van theih khawh rihmi cu Jesuh zong nih PA nih a dawt tluk tein kannih zong a kan dawt ve i kanmah ca hmanh ah nunnak pek a sian zong kha fiangte in kan hmuh khawh. Jesuh nihcun Ruang ngei loin a kan dawt i Jesuh nih a kan dawtnak hi a dinh zong ai din ballo i a dongh zong a dong bal lo I Laiholh cun hruhru hranghrang kan ti hnga maw, faktuk in Jesuh nih a dawtmi kan sinak hi kan hngalh. Cu caah cun Rome 8:38-39 chirhchan in van la ning law, Bawipa nih a kan dawtnak kong hi Vailamtah cung ahkhin fiangte in a lang. Cu caah cun Pathian dawtnak he a kan tthen kho dingmi hi vawlei ahhin zeihmanh a um lo. Vailam cung in Jesuh nihzeitluk in a kan dawt kha mei alh in a alh i nunnak ahhin Jesuh dawtnak kha tette a khan zungzal.

Vailam nih a langhter mi cu kan caah Jesuh hi a um zungzal, a kan dirpi zungzal i kan dernak ah a kan zaangfah i kan temtuarnak a kan hngalh dih i kan fahnak ah a kan ttahpi i a kan deuh lai lo i a kan kaltak lai lo zia kha vailam ahhin fiangte in zumtu nihhin kan hmuh khawh. Kan der caan ahhin tthawnnak a kan pek i thazaang a kan pek zungzal. Hi Pathian nihhin kan min a kan auh i kan caah hin hi Jesuh nihhin zungzal tein Pathian sin ah thla a cam i a kan nawlpiak zungzal ti hi fiangte in kan hmuh khawh. Harnak le fahnak le temtuarnak hi zeidah a lawh ti hi hngal dihtu Jesuh Khrih a si. Kan thinlung kuainak zong hi a kan hrawmpi zungzaltu Jesuh Khrih a si. Kan hmurka hmanh in kan Phuan khawh lomi ttihphannak vialte zong a kan teipiak khotu Pathian a si ti zong kha nolh chap ka duh. Kan ttah tikah kan sin ah a um i amah kut kan tlaih lai ding kha a kan hngak zungzaltu Pathian a si i fahnak chungin kan kut kan chanh tikah a kutza chanh dingin ai timhcia in a um zungzal mi Jesuh Khrih a si. A dong lomi a dawtnak he kan pawng ah a um mi Jesuh kan ngeih hi a tu bantuk harnak caan ahhin kan philh lo ding mi hi a biapi tuk. Kanmah le kanmah kan ichimh lengmang dingmi cu Jesuh Khrih nihhin zeitluk in dah a kan dawt ti kha a si.

 

2.Harnak chung i kan um lio caan ah zeitik caan hmanh ah kanmah lawng kan si ballo ti kha kanmah le kanmah kan  ichimh peng a hau; Hebru 12:1 ah hi tluk in vanrang zat in a tammi tehte bu nih khan kannih cu an kan kulh. Kan tonmi harnak le fahnak vialte a kan hmuhpiak zungzaltu tette, a sunparnak minmei nihhin zumtu hi zungzal tein a kan kulh zungzal. Kan mit in kan hmuh khawh lo zongah Pathian tthawnnak nihhin a kan kulh zungzal ti hi cathiang chungah fiangte in kan hmuh khawh. 2Siangpahrang 6:17 ah Syria nih Israel mi hna an dohnak hna kong kan hmuh. Zaan ah Israel umnak khua cung ahcun rangleng tthawng tthawng in tei ding ah Syria mi nihcun an va kal hnawh hna i an dum hna. Cu tikah Syria siangpahrang pa a sin ummi nih Israel mi pawl pawngkam ah rangleng a hmuh tikah khan Siangpahrang pa cu a chimh. Rengleng he an si a ti. Siangpahrang pa nihcun ttih hlah, anmah rangleng nakin kanmah Rangleng a tam deuh caah kan tei ko hna lai a ti. Cu tikah Elisa nih Thla a cam i Bawipa hi pa hi a mit auter law hruhter tuah a ti. Cu tikah Pathian nih tlangval pa cu a mit a auter tikah Elisa pawngkam ah rang le mei rangleng tampi nih tlangcung in an kulh ko kha a hmuhter.  A tawinak in kan chim a si ahcun Bawipa nih tlangvalpa mit kha a auter tikah minung nih minung nih an hmuh khahw lomi tthawnnak, rangleng tthawnnak in Pathian nih Elisa a rak umpi kha fiangte in kan hmuh khawh. Cu tikah Syria cu Samaria khua ah a luhter hna i a tawinak in cun that loin rawl an pek hna i Israel miphun kha hna an hnawh hna lonak kha Cathiang chung ah kan hmuh khawh. Cu caah cun kan pum cu ruak cuahmah hmanh sehlaw, Harnak nih kan kulh ko hmanhsehlaw hi nakin a tthawng deuhmi, Pathian nih vanmi in rangleng in a tthawnnak huham in zungzal tein a kan kilven i harnak chung ahhin kanmah lawng a kan kaltak ballo ti hi zumtu nihhin kan zumh lawng si loin kanmah le kanmah zong hi a tu bantuk caan ah Bawipa nih tthawnnak in a kan umpi ko, kanmah lawng a kan kaltak lo ti kha  remind kan i tuah tthan lengmang dingmi le kan ichimh tthan lengmang dingmi hi a biapi tuk. Bawipa cu kan harnak chung ah a kan kaltak lo i a tthawnnak in a kan huppheng zungzaltu a si kha, hngalh than ding hi kan sawm duh hna.

 

3.Pathian zumhtlak a sinak kha rel tthan caan, Pathian zeituk in dah zumhtlak a si kha kanmah le kanmah kan ichimh caan a si. 1Semual 7:12 kan reltik ah zeidah kan hmuh ti si ahcun Filitine nih Israel doh ding ah an ithawhnak kong a si. Israel miphun pawl cu Filitine miphun pawl nih doh dingin an va kal tikah israel mi nihcun an ttih tuk hna. An ttihtuk hna tikah Semual an timi cu Filitine kut in kan luatnak hnga Bawipa sin ah na aunak aw, na thlacamnak hi ngol hlah an ti. Cu tikah Semual nih a tuahmi cu, hnuk a ding liomi tu fa kha rai ah a thawi i  Bawipa sin ahcun thla a cam. A tawinak in cun Bawipa nih Semual thlacamnak cu a leh i AW pakhat in Filitine vialte cu khuarit in a rit hnawh hna i a hnuai dih hna tiah bible nih a ti. Israel mi hna hmai ahcun Filitine mi hna cu an zaam i Israel mi nih an va thah dih hna. Cu tikah tei khawh lo dingmi ral nih an kulh hna lio caan ah Israel mi nih fiangte in an hngalhmi cu Bawipa hi kan caah hin zumhtlak a si ko ti kha a si.

Cu tikah a hme 12 ah Semual nih a timi cu Lung pakhat kha a laak i a phun. Cu lung cu zetindah min a sak ti si ahcun a tu tiangin Bawipa nih a kan bawmh tiin a min ah Abenezer tiah a sak e. Bawipa hi a kan bawm zungzal tu kan Abenezar a si ti hi harnak kan ton lio caan ah kan tei khawh lo dingmi ral nih a kan kulh caan ah hin Bawipa hi kan Abenezar, a kan deuh ballo tu, a kan bawm zungzal tu a sinak hi ruah tthan lengmang kan hau. Harnak in a kan khamh tikah lawmhnak in kan khat tawn. Hi harnak chung zong in a kan khamh lai i hi chung zong hin a kan teipi tikah lomhnak in kan khat te lai kha fiangte in hngalhcia khawh a si. A umpinak nihhin a kan kulh zungzal i harnak kan ton caan ahhin Pathian sining hi ruah tthan lengmang kan herh. Pathian umpinak nih bia a kan kamhmi le kan fian khawhmi cu kan harnak hi a dongte lai ti hi a si. Sinain Pathian zumhnak sinak cu a dong ti lai lo i a kan deuh ti fawn lai lo ti hi harnak kan ton lio caan ahhin fiangte in kan hngalh khawh. Harnak chung kan um caan ah siseh,  kan ilomh caan ah siseh, zumtlak a simi Pathian nih a kan kaltak lo kha kan mah le kanmah hi kan ichimh peng dingmi biatak a si.Bawipa cu zumhtlak a si, zeitik hmanh ah a kan kaltak ballo mi Pathian a sinak hi ruah peng kan hau.

 

4.Hi bantuk harnak kan ton lio caan ahhin kan Thlarau mit hi kan tonmi harnak ah chia loin van ah chiah ding hi a biapituk; Kan thlarau mit hi vawleicung a cang cuahmahmi chia loin vancung ah kan chiah hi a biapi. Hebru 13:14 ah kan hmuhmi cu “hi vawlei ahhin kan nih caah cun zungzal hmun ding khua a um lo, a ra laimi khua tu kha kan cuan. Bible nih a kan chimh lengmang mi cu hi vawlei hi zungzal kan inn a si lo ti kha a si. Hi vawlei le a chung ummi vialte hi an lo cuahmah i tlaihchan awk an um lo hi…. cucaah cun nan nih cu vawlei ahhin zungzal um ding mi bantuk in um hlah u ti kha a si. 1Johan 2:15-17 nak ah vawlei hi si hna seh, a chung i thilri hna si hna seh, tlaihchan hna hlah uh a ti. 17nak ah vawlei le a chung ummi thil minung nih an duhmi hna hi an lo cuahmah cang. Sihmanhsehlaw, Pathian duhnak a tuahmi cu zungzal in an nung lai.

 

Hi chung ah bible nih ralrinnak a kan pekmi cu a lo cuahmah mi vawleicung thilri hi tlaihchan loin nan khuaruahnak hi vancung tu ah um deuh seh ti kha a si. Hi vawlei hi a dongte lai i, kan kaltak te lai i, cu vawlei a dongh te tik i kan kaltak taktak te tik ahhin nunnak taktak cu ai thok te lai. Biathlam 21:4, cu nunnak taktak, zungzal nunnak hmun ahcun mitthli tlak, ttahnak, thihnak, fahnak a um ti lai lo timi Bawipa biakam kha fiangte in kan hmuh khawh. Hi vawlei kan tuarmi harnak le fahnak vialte hi vancung mit, zungzal nunnak mit in kan zoh tikah zumtu hi vawlei ahhin teitu kan si tawn. 1Peter 1:4 ah Pathiannih a mi hna caah a chiahmi thluachuah van luhnak tampi cu co awk ah kan iruahchan. Cu thluachuahnak cu a thu a mam kho lomi le a ziam kho lomi a si i Pathian nih vancung ahkhin an chiahpiak hna. Pathian nih kan caah a chiahmi thluachuah co ding aa ruahchanmi kan si.

A thu mam kho lo dingmi thluachuah a si, a ziam kho lomi thluachuah an si i cu thluachuah cu Pathian nih vancung ahkhin a kan chiahpiak mi kan si kha fiangte in kan hngalh caah vawleicung ahhin zei bantuk dirhmun in kan dir zong ah kan mit hi kan thlarau mit hi, hi vawlei ah buaibaimi si loin van ah Bawipa nih ro sunglawi chiahpiak mi, amah sin ah zungzal um dingin timhpiakmi kan sinak tu kha biapi deuh ah kan chiah peng ding a biapi tuk.Hebru 10;34 ah a timi cu thongtla mi kha an thongtlak nan in pi hna i nan thil an in chuh hna tikah lunglawm tein nan pek hna. Hi thil hna nakin a ttha deuhmi thil le a hmun kho deuhmi thil nan ngeih kha nan hngalh. Thongtla mi kha nan tlakpi hna i thil an in chuh hna tikah lunglawmte in nan pek khawh hna nak a ruang cu hi thil nakin a ttha deuhmi nan ngeih kha nan hngalh caah a si a ti. Cu caah cun hi vawlei ahhin thong zong kan tla ko lai i hi vawlei ahhin thil zong an kan chuh ko lai.

Asinain kan nih zumtu pawl cu thil a kan chut mi hna kha lunglawm tein pek ding le thong kan tlak tik zong ah thongtla mi dang zong kha tlakpi tu kha kan rian a rak si deuh. Hi zawn ah langhter ka duhmi cu kannih nih hiti teinak kan ngeih tawn cu a hmun deuhmi thil vancung ah kan ngeih kan hngalh caah a si. Rome 8:18 ah a tu caan i kan inmi tem innak hi cu hmai lei i kan sin i phuan a si te laimi sunparnak he cun tahchun awk tlak ah ka rel lo. Cu caah cun a dong ding mi kan nunnak nih vawlei i a tonmi harnak, lungretheihnak le fahnak vialte hi van mit in kan zoh tikah kan co laimi zungzal nunnak he kan tahchun tikah cun hi harnak teitu kan si tawn. Ruahchannak ngei lo bantuk in vawlei harnak hi kan ton sual a si ahcun mi van chia bik kan si.

Cu caah cun hi vawlei kan nun hi zei tluk hmanh in har ko seh, Pathian nih zungzal nunnak caah a herhmi vialte hi a dawtnak in siang taktak in a kan pek zungzal ko caah hin harnak chung ahhin kan nih cu lotlau ding kan si lo i harnak pin lei ah Bawipa nih thluachuah za he a tinhpiak mi kan sinak tu ahhin kan ilomhnak le kan hnangamnak hi kan chiah deuh dingmi a biapi mi a si. Hi vawleicung harnak le fahnak le thihnak hi kan donghnak siseh law cu mi van chia ngai kan si hnga nain kannih mi vanttha kan sinak cu hika vawlei i kan tuarmi harnak vialte hi kan donghnak a si ballo kha fiangte in kan hngalh. Cu caah cun lungretheih caan ah kanmah le kanmah ralrinnak kan ipek peng dingmi le kan itheihter peng dingmi cu kan nih cu vawleimi kan si lo i vanmi kan si i hi vawlei ahhin har ko hmanh seh, van i kan co te laimi ro he tahchunh ahcun tahchun awk a tlak lomi nunnak a ngeitu kan si ti kha kanmah le kanmah kan itheihter peng i teitu nun kan ngeih dingmi hi a biapi tuk.

5.Kan nunnak kan zeizong hi amah sunparnak ah sermi ti kha kan itheihter peng ding mi kha a biapi: Bible ah kan hmuh lengmang mi cu Isaiah 43:7 zongah amah sermi kan sinak, amahta kan sinak le amah sunparnak caah sermi kan sinak kha kan hmuh i Kolose 1:16 zong ah amah thawng in Pathian nih van le vawlei zeizong vialte hi Khrih thawng cun a ser hna i Khrih caah cun a ser hna. Zeizong vialte hi Khrih thawngin ser a si i zeizong vialte hi amah sunparnak ding caah sermi an sinak kha kan hngalh. Cu caah cun zeizong vialte ah kanmah zong kan itel i kan nunnak zong ai tel i vawlei zong ai tel i kan problem vialte le kan phanmi vialte le vawlei cung zawtfahnak vialte le zeizong vialte hi Bawipa hngalh loin a cang lomi thil an um lo caah hi vialte zong hi Bawipa nih amah sunparnak caah a sermi an si ti hi fiangte in kan hngalh khawh. Zumtu kan nunnak ah a um tawn theo mi cu kanmah thluak nih a hngalh khawh lomi thil kha Pathian sunparnak caah a si ko ti hi cohlan kan iharh ngai tawn.

 

Cu tikah Pathian kha biahalnak kan tuah tawn, ziah hi hi a can, Bawipa a can awk si ttung lo, kan duhmi a si ttung lo, zeitindah na sunparnak caah cun a si khawh? Tiin zumtu nun ahhin lung buai in kan um tawn. Sihmanhsehlaw, Isaiah 50:8-9 ah fiangte in cathiang nih a kan cawnpiakmi cu Bawipa nih “ka ruahning cu nan ruahning a si lo, ka thil tining zong nan thil tining he ai khat lo, van khi vawleinak in a let tampi in a san deuh bangin, ka ruahning le ka thil ti ning zong, nan ruahning le nan thil tining nakin a let tampi in a sang deuh. Bawipa rianttuannak hi a lianngan tuk tikah kannih nih kan duh lomi thil kan ton tikah hin Pathian duhmi hi zeidah a si ti hi hngalh khawh a har tawn. Sihmanhsehlaw, bible nih fiangte in a timi cu lei le van i a cangmi vialte hi (sermi thil vialte hi) amah sunparnak ca lawngte an si ti kha fiangte in cathiang nih a kan cawnpiak mi a si.

 

Cu caah kan nunnak ah kan tonmi, vawlei ah a cangmi pawl hi a ruang hngal hlah hmanh usihlaw, Pathian lamkaltu lawngte an si ti kha cathiang cawnpiak ning a si caah zumtu nih kan hngalh khawh lomi thil pawl kan ton tikah hin Pathian sunparnak ding ah Bawipa nih a sermi a si ti kan zumh khawh hi a biapi ngai. Zeizong thil vialte hi kanmah ruahning nakin a sang deuhmi ruahnak he Pathian nih a canter mi thil lawngte an si. Zei ruang ah tiin kan lung cu a fiang lo kho men. Sihmanhsehlaw, Pathian nih kanmah nih kan fian khawh lomi le a lianhngannak rian, kanmah nih kan fianter khawh lomi thil in a lianhngannak rian kha ttuan a duh i kan harnak le vawlei cung ah kan tonmi buaibainak vialte hin amah sunparnak rianttuan a duh ti kha fiangte in cathiang chung ah kan hmuh khawhmi a si.

 

Cu caah cun vawlei ah a cangmi thil, vawlei ah kan tonmi thil, kan duhmi siseh, kan duh lomi siseh, zei tik hmanh ah a lak a si bal lo i nunnak sawksam tu menmen zong khi zeitik hmanh ah an si ballo. Hi thil vialte hi kan caah a tthami a chuahtertu an si tawn i amah sunparnak petu an si tawn ti hi cathiang cawnpiaknak a si. Jerimiah 29:11 ah kan hmuhmi cu “nan caah ka tinhmi cu keimah lawnglawng nih ka hngalh tiah Bawipa nih a ti, cucu vanchiatnak si loin thluachuahnak a si lai i nan hnu i a rawng um dingmi nan tefa kong ah a si lai. Zeizong vialte cung ah nawlngei bik Pathian nih nan caah ka tinhmi cu keimah lawng nih ka hngalh a ti. Kan har caan ah kan fawi caan ah zei bantuk dirhmun kan dir caan zong ah kan caah a tthabik mi tinhmi a hngaltu cu amah Pathian lawnglawng a si.

 

Cucaah cun vanchiatnak a si lai lo, vantthatnak a si lai a ti chap rih. A vun peh rihmi cu a ralai mi nan tefa tiang caah a si lai a ti. Nihin kan tonmi thil vialte hi a ruang hngal hlah hmanh usihlaw, zeizong vialte le kan nunnak hrimhrim hi amah caah sermi a si ti kan fian ahcun zeizong vialte hi sunparnak ca lawngte an si ko ti hi kan thlarau nih a cohlan khawh. Cucaah cun zumtu kan nunnak caah, tuzan ahhin keimah pumpak zong nih van tharchuah tthan ka duhmi cu harnak chungah kan um lio caan ahhin kanmah le kanmah bia kan iruah, kan thluak i kan hun kuat lengmang bia hi biatak a si dingmi a biapi tuk. Thawngpang tthalo lawngte kan kuat i lungretheihnak in kal kho loin kan thlarau nunnak zong zaw dih lakin thawngpang tthalo, thawngpang chia lawngte kan kuat dingmi nak nakin Pathian biatak tu kanmah le kanmah kan iruah dingmi a biapi. Cu biatak hna cu Pathian a kan dawt timi biatak hi ai ruah lengmang dingmi kan si.

 

Kanmah le kanmah hi zeitluk in dah vailamtah cungah Bawipa nih a kan dawt ti kha fiangte in kan hngalh khawh caah Bawipa nih dawtmi kan sinak hi philh lo ding a si. Fapa neihchun te hmanh a kan pek i thil dang cu a kan pe ko hnga lo maw? Pathian dawtmi kan si hi atu bantuk caan ahhin philh lo ding a si. A dawt bikmi a fale hna cu a thukbik mi muihnak chung i an um zong ah a umpi hna i a chuah tthan kho lengmang tu Pathian a si kha atu lio caan ahhin kan ruah dingmi a si. Kan harnak chungah Pathian nih a kan kaltak ballo dawkaw ti kha, kanmah le kanmah kan ichimh lengmang dingmi a si. Kan hmai lei kong hi hngal kho hlah hmanh usihlaw, Bawipa nihcun a ka kaltak bal lai lo. Amah he kan kaltti peng ko lai.

 

A thukbik mi muihnak chung kan um zong ah Bawipa a um i a sangbik mi van ah kan kai zong ah Bawipa a um i rili tawne i kan va kal zong ah Pathian a rak um ti kha a tu bantuk caan ahhin kanmah le kanmah kan itheihter tthan lengmang dingmi kha a biapi tuk. Pathian cu zumhtlak a si i a mi hi zeitik hmanh a kan deuh ballo i kan umpi hna lai kan khamh  hna lai, a ti tu Pathian hi a kan deuh ballotu Pathian a si i, cu zumhtlak a sinak sining kha kanmah le kanmah hi theihternak kan ituah peng kha ahau. Cun harnak kan ton tikah lungretheihnak chungin ka chuak kho ti lai lo tiah kan iruah caan ahhin a biapi tukmi cu kan thlarau mit in van fa kan sinak le Bawipa nih vancung ah ro ttha a kan chiahpiaknak hi cuanh deuh le kanmah le kanmah zong hi vawlei mit ah, vawlei kong ah, kan thlarau mit chia lo ding ka si, vancung khua tu zoh deuh ding ka si ti kha kanmah le kanmah hi kan itheihter peng a hau. Hi vawleicung kan nun hi cu kan dam zong ah kum 60/70 a si ko.

 

Hi kan harnak hi zeitluk in a har zong ah a dongte ko lai. A tu lio kan ttihmi Coronavirus zong hi zungzal um dingin thla kan cam zong ah a um lai tiah ka zum lo. A ziam te ko lai. Mah nakin a biapi deuhmi cu van fa kan si hi zei bantuk harnak hmanh nih le zei bantuk zawtnak hmanh nih a thah khawh lomi zungzal nunnak fa, zungzal nunnak rocotu kan simi hi philh loin kanmah le kanmah hi van fa dawkaw ka si, vawleicung a cangmi thil vialte nahhin na lungrethei hlah, hi nihcun na pum lawng a hrawh khawh. Cu caah cun vancung khua, van fa na sinak tu ahhin ilawm ko ti kha kanmah le kanmah kan ichimh peng hi a biapi. 

 

Adonghnak te ka nolh a si ahcun zeizong thil vialte hi zawtnak a si zong ah, fahnak a si zong ah ttahnak a si zong ah, lomhnak a si zong ah minung kan si zong ah van arfi thlapa zeizong vialte hi Pathian nih amah caah Khrih thawngin a sermi lawngte an si ti ruah zungzal kan hau. Bawipa nih a theih loin a cang mi zei thil hmanh a um lo, kanmah nihcun kan fiang lo kho men, kanmah nihcun a ruang kan hngal lo kho men nain, nan caah thilttha ka tinhmi keimah a hngaltu ka si. Nan khuaruah ning le ka khuaruahning hi van le vawlei in ai hlat. Zawtfahnak nih a kan kulh tik zongah Bawipa mawhchiatnak nakin Bawipa nih hi khuaruahharnak chungin zeithil dah a tuah lai ti kan hngah i Pathian sunparnak caah zeizong vialte a cang tawn ko ti kha a thar in kan ruah tthan a hau.

 

Kanmah le kanmah kha Bawipa sunparnak caah zeizong te a si i keimah pumpak zong hi ka nun ah siseh, ka thih ah siseh, Pathian sunparnak caah tinhmi ka si ti kha fiangte in theihternak kan I tuah lengmang hi a biapi tuk. Cu caah cun hi capar a relmi zumtu vialte hna vawleipi kan thilrit, vawleicung ah kan tonmi harnak, lungretheihnak vialte hi van mit in kan zoh caan a si. Zeizong vialte hi Pathian nih amah sunparnak ding caah a canter mi thil lawngte an si ti kha biatak in thuk chinchin kan hngalh khawhnak ding caah kan ruah caan a si. Cucaah cun kan lungretheihnak nihhin kan harnak in a kan luatter lai lo i Bawipa bochannak tu nihhin damnak a kan pek lai. Cu caah cun kanmah le kanmah bia kan iruah tikah Pathian sual a phawmi Satan aw an si, Satan sin in a rami kha kanmah le kanmah ichimh si lo in Bawipa biatak tu kha kanmah le kanmah ichim ko hna usih. Amen