Laimi Khrihfa Kan Tthan Khawhlonak A Ruang Hi Hruaitu Nih Tinhmi Ngei Loin Rian Kan Ttuan I Member Kan Hruai Hna Caah A Si

Laimi Khrihfa sinak kum 100 leng a si cangmi zeiruang ah tthan hnga tluk kan tthan hnga lo tiah cun thil tampi lakah pakhat cu hruaitu hna nih tinhmi ngei loin a zawn chuak paoh le a cangmi paoh phisin tuaktanmi ngei loin le tinhmi ngei loin member kan hruai caah a si. Tinhmi a ngei lomi Khrihfa or Khrihfabu cu zeiti hmanh a tthan awk a ttha lo.

 

Tahchunhnak pakhat van la ning law, Laimi tampi umnak lakah Khrihfabu ngan pakhat, mifim deuh an i butnak tiah kan ruahmi hna nih Camping le Crusade tuah an itim i cawnpiaktu pakhat an sawm. Cu an sawmmi cu mi puitling a fimmi le khuaruatmi a si caah, hitin bia a hal hna. Tutan nan ka sawmnak ahhin tinhmi nan ngei maw? Zei bantuk tlangtar dah chim seh ti nan ka duh? Tiah Sawmtu Khrihfabu Pastor a hal. Sawmtu pastor nih aaa tinhmi kong ceihmi kan ngei rih lo. Cu caah hruaitu (Khrihfa upa ) ka chimh hna lai i cu hnu cun thawng kan thanhte lai a ti. Ok… Siseh an ti.

 

Pastor pa nih Khrihfa upa pawl meeting ah kan Speaker pa nih tinhmi tlangtlar nan ngei maw? tiah a ka hal i zeitin nan ruah? Tiah a ti hna i meeting a tthumi pawl nih an ceih i tinhmi (tlangtar) ngeih kha a ho hmanh nih an duh lo, Pastor siseh, hruaitu upa vialte zong nih siseh a hohmanh nih an duh lo. Thlarau  a tlak ning paoh si ko seh tiah lungrual takin bia an chah.

 

A fiang ko mi cu; kha hna Khrihfabu hruaitu upa hna le pastorate nihkhan an khrihfabu le member caah saduhthahpiak mi le hitin tthang hna seh timi vision pakhat hmanh an rak ngeih lo caah a si. Cu bantuk Member caah muihnak chung i lamkal he ai lo cang. An caah thlarau tthannak cu ruahchannak a pit bak. A ruang cu anmah nakin athei hngal deuh ah an ruahmi le an ibochan mi hna an hruaitu pawl nih an caah tinhpiak mi pakhat hmanh an rak ngeih hna lo ahcun an nih ca chinchin ahcun a pit ko. Chim awk a um ti lo.

 

Hi bantuk hruaitu nih tinhmi ngei loin cawnpiaktu an sawm tawn hna caah Evangelist pawl nih an duh paoh in an cawnpiak hna i a zei hi kan zumh deuh lai tiah member caah biachahnak a har tuk cang. Cu bantuk ruang ah thil nih a hranhnak lei paoh a choimi favai bantuk in a kenkip lo ah an kan choih i tthang kho loin a kan tuahnak a si.

 

Cu pin ah Khrihfabu nih tinhmi ngeih i tlangtar thim zong ah sawmmi cawnpiaktu nih chim duh loin mah duh paoh in a chim a hmangmi zong kan tampi fawn. Cun bantuk tinhmi ngei loin kan icawnpiaknak nih Laimi Khrihfa kan tthan hnga tluk a kan tthanter kho lo. Laimi hi zei kan tuahnak paoh tinhmi ngei loin tholung bangin siarem deuhnak sawsawh ai let lengmang mi bantuk kan tamtuk. Innchungkhar ah siseh, biaknak lei ihruainak ah siseh, vawlei lei ithithruainak ah siseh, tinhmi ngei loin thil a cangmi paoh a canning hoih kan phisin sawsawh lengmang ruang kan tthan khul a nuarnak a si.

 

Laimi ithithruainak Organization ah hmun tampi ah kai tel i a ho kan hruaitu hmanh tinhmi an ngei hna lo. Thil a cangmi paoh kha meeting ah an chuahpi an ceih i cuti ning cun an phisin. A dang a hung cang nolh i an ceih nolh tthan i an lim tthan. Cuti cun hruaitu lubik zong nih hi hrimhrim ka ttuan lai a phi a chuah tiang tiah tinhmi an ngei hna lo. Amah i suai cia hitin kan kal lai timi zong an ngei lo. Thil cang mi phisinnak i chair a tlaitu bantuk sawsawh an si hna. Cu nihcun tthanchonak a chuahpi kho lo. Careltu vialte hmailei ah kan itelnak cio ah tinhmi tthate a ngeimi si izuam cio hna usih! Amen