Puicimhnak Kan Tonmi Ngaihchiatnak Nakin Kan Kutsamh Ning Zoh Ah Ngaih A Chia Deuh

Leng le val rual hna nih kutsih in an lennak le zaihla an saknak, semmawng hna le seihno hna nih zul thluaimai in fimnak siangruun an panhnak, kan biak Pathian kan thangtthatnak biakinn hna, kan mifim vialte nih khua an saknak kan Hakha khualipi cu July 26.2015 in ruah fakpi in a sur i, july 29.2015 in a cim ruangmangmi ruah tikah kan thinlung vialte a kekkuai dih cio hna. Kan miphun minung thong tampi umnak ngei lo rawl-ei awk ngei lo le ruahsur lakah thingphang thlalau in zeilam ka zawh lai ti loin a ummi hna ruah tikah ngaih a chia tuk! Kan Laimi media kip le group kip ah ngaihchiatpi lawngte a khat i Laimi hi ai daw ngaimi, a zawn ai ruat ngaimi miphun kan lo ngai. Asinain kan kutsamh ning zoh ahcun ngaih a chia hringhran.

 

Ziah! Cu tluk in kan ngaih a chiatmi, kan lung a fahmi, kan tuarmi ah kan kutsamh ning zoh ahcun ningzak ngai a si. Kawlpa, miphun dang pa nih tawr tawr in an kut an samh ttung! Ziah nang le kei kan kutsamhmi zoh tikah ningzak a si ttung! Kawlpa le miphun dang pa cu an rum deuh kan ti men lai. Asinain, kanmah le ti khawh tawk ah kan kutsamh ning kha a tam deuh ve awk a si. Ram leng ummi Motor hmanh Dollar a ting man a ngeimi nan tampi. Inn lo tthattha a ngeimi tampi nan um. Donate tuahnak zoh tikah $10 tamtuk ka hmuh. $ 50 le $100 a tlangpi a si. $ 10 hna cu suimilam pakhat kan hlawhmi a si. $ 100 cu nikhat kan hlawhmi lawng a si. Cu tluk in kan ngaih  a chiatmi kan tuarmi ah na nikhat hlawh lawng maw Donate (hlut). Private mi kan bawmh hmanh ah a thongthong in kan bawmh tawn ko ttung hna ti hi ruah a herhmi a si.

 

 

Ziah! Hlan lio chan ah khua pakhat khat nih Innkang meittek an ton le zatlak puicimhnak an ton ah kan thazaang dihlak le kan caan vialte pe in hawi dirhmun in khua an sak khawh tiang an rak tawlrel hna. Tutan ah cu bantukin thil kan tuah lo ti hi ruah lo awk a ttha lo.