“Zarhpi ni zingkate ah, khuadei hlanah khin, Mary Magdalin
cu thlan ah khan a va kal i thlankhar lung a rak i thawn cang kha a hmuh. Mary
cu a tli i Simon Peter le zultu dang pakhat, Jesuh nih a dawtmi kha, “Bawipa
cu thlan chung khan an lak cang i khuazei i an chiah kan hngal lo,” tiah a
chimh hna. Cun Peter le zultu dang cu an i thawh i thlan ah cun an va kal. An
pahnih cun an le, zultu dang kha Peter nakcun a tthawng deuh i thlan kha a phan
hmasa. A vun bih i khiangrang puan kha cu a hmuh hna, sihmanhsehlaw a lut lo. A
hnu in Simon Peter cu a ra le cutmat i thlan ah khan a lut colh. Cuka i a ummi
khiangrang puan le Jesuh lu an mennak puan kha a hmuh hna. Cu puan cu
khiangrang puan hna sinah khan a um lo, amah dang tein aa zual. Cun thlan a
phan hmasami zultu zong kha a lut ve i a hmuh i a zumh. (Cathiang nih thihnak
in a tho tthan lai tiah a timi kha an hngal tthiamtthiam rih lo.) Cun zultu hna
cu inn ah an kir” (John 20:1-10)
Ni hin cu Khrih Jesuh nih mipi sin ah rian a ttuan lio i a
rak chim chung mi kha a tak in a tlinter ni, Khrihfa mi hna kan zumhnak a
fianter ni, cun thihnak tthawnnak kha Jesuh Khrih nih a donghter i teinak he a
thawhtthan ni a si.
Khrihfa mi hna nih kan sunsakmi ni thiang pakhat a si.
Zumtu cheukhat nih biahalnak ah kan chim tawnmi cu X’mas maw a biapi deuh,
Thawhtthan ni dah ti hi a si. A zei deuh ti kan thim zong ah vawlei mi hna kan
caah cun sullam an ngei veve ko. Cu chung ah a biapi bikmi a muru cu nihin i a
thotthan mi kan Bawi Jesuh Khrih hi a si. Cu caah nihin thawhtthan ni zong ah a
ni le caan le thil sining nak in amah Khrih Jesuh kha kan nganter deuh awk a
si. Mary Magdalin cu zingkate ah khuadei hlanah khin Jesuh an vuinak thlan a va
kal tikah a ruah lo ning in thil a cang i, zultu hna he thlan chung ah an lut i
an cawlcangh ning nih a kan cawnpiak mi ruat ti hna usih.
Mary cu zingkate i thlan ah a kal nain, zeiruang cem ah dah
a kal ti cu theih a si lo, Johan zong nih a ttial lem lo. Zeidah a cang lai ti
hi cu a hngal ve hrim lo nain Jesuh umnak hmun ah cun a kal ko. Thlan hmun a
phak tikah thlankhar lung a rak ithawn cang kha a hmuh i, a tli i Simon Peter
le zultu dang pakhat kha a va chimh hna.
Mary nih a hmuh tawn mi cu a timh mi kha si loin a dang
khuaruahhar tu kha a si, a ruahkhawh lomi thil tu kha a cang. Thihnak in a
thotthan mi kan Bawipa Jesuh cu zumtu hna kan ruah khawh lo le kan phak
khawhlonak a kan phaktertu, kan ruahkhawh lo pinlei tiang thluachuah a kan petu
a si. A luanciami kum za leng in Jesuh cu Lairam ah a thawhtthan caah, nihin
Laimi kan ruah khawh lo pinlei tiang le kan i tinhlo ning tiang in thluachuah a
kan pek hi a si. Thawhtthan zing ah Mary kalnak thlan lei cu hei cuan ve usih
Khrih nih kan caah a kan tinhpiakmi a um ko.
Mary le Peter le zultu dang kha thlan ah cun an va tli tthan
i Peter cu thlan chungah cun a va lut, a hawipa zong a hnu in a lut ve. Thlan
chungah cun Jesuh Khrih a lu an mennak le an zualnak khiangrang puan cu an
hmuh. Mary chimmi cu a tak in an vun hmuh tikah an zumh i inn lei ah cun an
kir.
Hi ka zawnah vun ruah tthan ka duhmi cu Jesuh puan kong hi
a si. Jesuh Khrih vailam cung an khin lio ah khan ralkap pawl nih Jesuh hnipuan
cu an i tthen i camcawhfung an zuh. Ralkap nih cun Jesuh cu Messiah a si kha an
fiang lo, amah mipum kha a biapi deuh ah chiah loin a thil puan tu kha an duh
deuh i an i cuh. Cu lioah vailam cung i misual an tahchihmi pakhat zong nih
Jesuh kha thim loin luatnak le thil-ti-khawhnak khuaruahhar tuah kha a fial. Cu
cu zumlo tu hna le thawh`hannak kong le Jesuh hi mizei set dah a si ti a fiang
lomi hna lungput a si. Sihmenhsehlaw, Peter le Mary le zultu pakhat nih puan
kha an i cuh lo, Jesuh tu kha khawika dah a si hnga tiah an kawl i inn lei ah
an kir. Annih nihcun a puan nakin Jesuh kha an duh deuh i an i thim, an zumhmi
zong a si.
Zumtu kan sinak ah Khrih hi a biapi bikmi a si ti kan philh
ttheu tawn. Rev. Dr. Duh Kam nih a chim mi cu “Laimi cheukhat cu, a puan tu
kan i cuh i vailam cung ummi pa a biapi deuh kha kan hngal loh, kan zumh mi kan
i fiang lo tiah a ti.” Laimi khrihfabu ah Khrih kha a biapi deuh ah kan
chiah lo chung paohpaoh cu, kan khrihfabu a nganfak lai, kan community tthennak
a chuak lai, chungkhar ah buainak a chuahpi lai, inn pa chakthlang he remlonak
a chuah pi lai. Cu caah nihin zumtu hna nih zeidah a biapi bik ti hi ruah tthan
a hau, kan zumh mi le kan kawl mi hi a tho`han mi Khrih hi a si taktak hnga
maw.
Thihnak tei in a thotthanmi Khrih cu dawtnak a si,
ngaithiamtu a si, mi sifak le nuhmei ngakttah dawtu a si, mi zawnruatmi a si, a
dohtu Pharasee hna zong a pheu hna loh, a cawnpiaknak a hrawmh ve hna, an
zumhkhawhnak tu ah an sin ah rawl a ei, an inn ah a leng, cu nun cu thawhtthan
nun cu a si.
Zumtu cheukhat cu Khrih kha biapi deuh si loin a puan tu
kha kan ruat deuh sual tawn i, miphun hawi kan daw kho ti lo, thlarau rawlttam
mi kha pe ti loin na rawl a thaw timi lawng pek kan hmang. Zumhnak der mi kha
bawmhchanh i kalpi tu si loin, a tluk le a der chin kha hmuh kan duh. Cu caah
nihin ah Lai miphun kan sining hi thlarau ah, zumhnak ah a nganfak mi le a
tihal mi kan tam peng ko rih hi a si. Cu caah Jesuh cu kan nun ah a biapi bik
ah chia usih, tho tthan cang seh, khrihfabu i daw usih, miphun i zohkhenh usih,
zumhnak ah zawnruahnak ngei usih, kan khrihfabu le mipi thlarau le zumhnak tthanchonak
ah i bawmchan usih.
Kan Bible kha van zoh tthan usih law, thlan chung ah cun an
zualnak le a lu mennak puan cu a ho nih la loin a um ko. Hi puan cu Josef le
Nikodemu nih an vui lio i an zualnak a si (John 19:38-41). A thawhtthan tikah
cun a chiah tak i thlan chung menmen ah an tang ko. Minung pekmi puan le thil a
chiahtak mi nih thih hnu pinlei thawhtthannak ah hin minung serchom mi le
thil-ti-khawhnak zeihmenh a um lo, Pathian lawnglawng a si ti kha a fianter.
Calvary tlang kha hei cuan tthan hmanh. Ralkap pawl an i
cuhmi puan le vawlei thilri bantuk kha a donghnak ah cun thlan tiang lawnlawng
a phan kho mi an si. Thihnak in thawhtthannak ah a tel kho le a biapi mi an si
lo. Nihin i vawlei thil ah kan buai mi hi zei an si lai lo, donghnak an ngei
lai. Nain vailam cung i an tarmi Khrih tu cu thihnak tthawnnak kha a donghter
tu a si i thih thiam ti lo nak kha kan sinah thawngttha in a phuan cang ( 1Tim
1:10).
Hi vawilei cung minung hna kalning le sining te hna, minung
sinak in kan ruahmi le kan duhmi te hna, chun zaan ti loin kan kawl cuahmah mi
vawilei rumnak hna le nifatin nuamhnak ah kan kawlmi vialte hna hi, hawi dawt,
thlankhur tiang lawng an phan lai. Thawhtthannak ah an i tel kho lo. Khrih nih
a thawhpi chih mi zeihmenh a um lo. Kan Khrihfa sining cu hi bantuk hna nih kan
buaipi ti hlah seh; vailamcung i khenhchihmi Khrih lawnglawng kha nihin a
tho`han mi cu a si.
Mary nih cun Jesuh ruak cu khoi ka dah a um hnga, an thuh
hnga maw, ka va lak lai i thlan ah ka chiah tthan lai ti phun in aa tim i, a
kawlmi Jesuh a hmai i a um tiang zong hngal kho loin cu kong cu a ruat. A thotthan
mi Jesuh cu a fiang lo, a hngal lo. Zumtu kan nun ah Jesuh kha a thi mi kawl in
kan kawl `ttheu; kanmah duhning deuh in siseh tiah khuakhan piak kan timh,
khrihfabu le mibu sinah keimah zumhnak le ruahnak kan ti deuh, khrihfabu a lu
si mi Jesuh kha kan philh caah, Mary bang kan miphun hi a nganfak i kan mithli
a tlak thluahmah hi a si. Mary nih Khrih kha a si ti a fian hnu cun amah duhnak
tu si ti loin Jesuh tu nih tuah ding rian kha a fial i a chim bang in a tuah.
Thawnhtthannak kha a zumh i a fiang mi hna cu Jesuh duhnak tuah tu kha an i
thim, cu cu Bawipa duhnak asi, Pathian duhnak le pennak kan tuah hmasa cun a
dang hna zong chap chih kan si ko lai (Matt 6:33).
Cu caah dawtmi zumtu vialte hna, nihin thawhtthan ni ah hin
zeidah a cang i, kannih tah zeidah kan kawl awk a si ti kan i fiang maw? A puan
kong kan buai ko rih si ahcun, thluachuah, lunglawmhnak, le thiangthlarau tlun
tikah zei as i kan i fiang lai lo i a zohtu men men lawng kan si ko lai. Nihin
a thotthan mi cu Khrih Jesuh lawng lawng kha a si.
Careltu kan dihlak Khrih thawhtthannak thawngttha nih a kan kamhmi
thlarau tthawnnak le zumhtlak sinak nih lam kan hruai cio ko seh.
No comments:
Post a Comment