Amah Pathian Nih An Zohkhenh Hna Caah Nan Lungretheihnak Vialte Cu Amah Sin Ah Chia Dih Ko U!

Thi deng in na lungretheihnak nih zeital a chuahpi kho maw? Na lungretheihnak nih himnak lei ah an kalpi hlei maw? Miaknak an hmuhter hlei maw? Na nunnak teh second pakhat tal na lungretheihnak nih an khamh maw? Kan lungretheihnak nih zeihmanh miaknak le hlawknak, nunsaunak a kan pekmi a um lo. Ziah! Zeihmanh a tthathnem lomi kong ah na lungre a theih tawn?

A liamcia na nunnak vialte kha ruat law, nangmah nih zeital na tuah khawhmi a um maw? A liamcia na nunnak vialte an zohkhenhtu kha a nung Pathian a si ko ttung? Nangmah nih na rak tuah khawhmi ruangah luatnak le himnak na hmuh hlei ttung lo? Ziah! Tuchun ni tiang ah na lungre cu a theih peng? Na lungretheihnak nih a liamcia caan zong ah an khamh in an luatter hlei lo i, atu caan le a ralai mi caan zong ah na lungretheihnak nih an khamh in an luatter hlei lai lo. Cucaah lungrethei in um ti hlah! Na lungretheihnak kha amah Pathian sin ah chia diam ko.

 

1Piter 5:7 ah kan hmuhmi cu “Amah [Pathian] nih aan zohkhenh hna caah nan lungretheihnak vialte kha amah cungah chia dih ko u” ti kan hmuh. Kan nunnak kan zeizong vialte hi amah nih zohkhenhmi kan si. Lomhnak kan ton le himnak kan hmuh zongah amah zohkhenhnak tang ah kan um i Vanchiatnak puicimhnak le harnak lak le ralkut tangah kan um zongah amah zohkhenhnak tang tthiamtthiam ah kan um. Cucaah nangmah kha lungrethei ngai in na um kha a herhnak pakhat zong a um lo. Na lungretheihnak nih zeihmanh tthatnak a chuahpi hlei lo. Himnak le luatnak zong an pe hlei lo.

Amah nih nawlngeihnak pakhat hmanh a ngei lomi SAL nih a nunnak kong le an pawcawmnak nunnak kong ah lungrethei ngai in khua a sak cu zeidah a tthahnem? Amah nih a nunnak kong ah nawl a ngei in amah tein himnak, lomhnak ai pek khawhmi a um hlei maw? Pakhat hmanh a um lo. Cucaah kan nunnak kong ah zeihmanh kan tuah khawhmi a um lo caah lungrethei in um hna hlah usih! Kan cungah zeizongte lai a reltu, khua a khangtu, kan nunnak a ngeitu Pathian sin tu ah kan lungretheihnak kha chia dih ko hna usih!

Na rum zongah amah thawng. Na fim zong ah amah thawng.  Na thiam zong ah amah a thawng. Nai lawmh zong ah amah thawng. Upatnak na hmuh zongah amah thawng. Cu bantuk in na siifahtuk zong ah amah thawng a si. Na fimlo zongah amah thawng a si. Na thiamlo zongah amah thawng a si. Harnak hawrthukpi chung, ral kuttang ah na um zongah amah thawng tthiam a si. Cucaah zeibantuk na ton hmanh ah amah thawng lawngte an si ko caah, nangmah lungretheihnak ding pakhat hmanh a um lo. Na lungre a theih peng rih ahcun a nung Pathian na zumhnak a feklo bia maw thil pakhat khat dek a si kho. Cucaah icheck tthan nah au.

Harnak tong lo dingin le lungtheihnak, vanchiatnak le puicimhnak vialte hrial dingin le tong lo dingin zeitik hmanh ah Pathian sin ah thla va cam hlah! Zeitluk na cam zong ah na tong tthiamtthiam ko lai. Na luat hlei lai lo. A ruang cu harnak tong dingin Pathian nih a kan sianhmi, kan si. Cu nakin cun harsatnak le vanchiatnak, puicimhnak le zawtfahnak kan ton tikah intuar khawhnak lungthin le thazaang tthawnnak tu kha hal law, cucu na hmuh deuh lai.

 Pathian nih a mifa hna hi Ti thuhnak lei ah a hruai tawn hna. Cu a hruai hna lio ahcun micheu cu kan ik, kan isual, kan ital, tlang ah chuah kan izuam. Nain a kan hruai chih peng. Kan luthlung kan pil tiang a kan hruai theo i, kanmah tein kan cawl khawh ti lo tiang a kan hruai theo tawn. Nain, kha bantuk Ti thuhnak ahkhan Pil thai in a kan namta in tlang ah amah lawng in a kan chuahtak ballo. A kan hruai tthan i himnak a simi tiva tlang ah a kan hruai tthan tawn.

Cucaah Pathian nih harsatnak chung an hruai lio caan ah nangmah tein luatnak dingah i sual in cawl len hlah! Na cawl in na luat kho hlei lai lo. Pathian hruainak kut cu a tthawngtuk. Na tei lai lo. Cu nakcun daite in um law, amah nih a himnak hmun tiva tlang ah an hruai tthan ko lai. Cucaah zei bantuk kong ah hmanh nangmah na tuah khawhmi a um lo caah na lungretheihnak zong amah sin ah chia diam ko. Amah nih cu hlan na nunnak vialte an tawlrel bangin na hmailei zong amah sin ah chia ko. By; Stalin Tha Cung Lian