Chin TV Nih Malaysia Um Kan Laimi Tar Pahnih Biahalnak An Tuahmi Hna An Tonmi Harsatnak Hi Ngaihchia Tuk A Si

Malaysia um Chin Refugee UNHCR nih Card an chuhmi hna kong ah Zeitluk in dah Card chuhmi pawl harsatnak an ton timi biahalnak kong a si. Malaysia um kan Laimi an harsatnak kong ah ttuanvo ngeitu Laimi kan upa hna le biangaitu kan zate nih kan fimnak, kan thiamnak le kan ngeihchiah in bawm cio ding ah kan in sawm hna.

 

Tarpa bia:Keimah cu Malaysia ah kum sau nawn ka um cang i ramdang ah ka kal kho ti lo. UNHCR lei ca ka tial zong ah zeihmanh lehnak ka hmu lo. Mah hnu cun ka lung a thei tuk i UNHCR lei an rat caan ah bawmh ka hal lengmang hna nain bawmhnak zeihmanh ka hmu hlei lo. Cu caah cun mah ka harnak hi nan ka bawmh khawh nakhnga chim ka duhmi a si. Kan khua ka um lio zong ah Naga le Kawl ralkap an i kap i ka I phurhmi a kangh dih ( ti a si rua, ka fiang set lo). Kan fa hi kawl ralkap nih meithal in an kah mah zong ahcun zeihmanh bawmhnak kan hmu lo. Khuami nih a kan bawmh. Cu tikah khua ah kan hartuk le Malaysia kan hung phan. UNHCR sok a ngah an ti i kan sok zeihmanh bawmhnak kan hmu hlei lo. Malaysia ka umnak hi kum 17/18 si cang i ka nupi le fale he kan ngaingai. Sianginn ka kaiter kho ti hna lo. Kum 14 in rian ka ttuanter hna. Hi ahcun van ka zoh ah a sang vawlei ka zoh ah a pit timi kha ka si ko. UN lei zong in zeihmanh bawmhnak ka hmu hlei lo. Ka lungre a thei tuk. Bawmh ka va hal hna zong ah zeihmanh ka hmu hlei lo. Pathian sin ah thla ka cam. Ka lungfah le ka ngaihchiat ruangah bia zong ka chim kho lo. A hohmanh bochan ding zong ka ngei lo. Pathian lawnglawng kai bochan ko. Hi ka harnak vialte hi keimah nih zeihmanh ka tuah khawhmi a si lo. Cu caah hi ka sayate nih bia an ka hal mi hi an cung ah kai lawm ngai. Ka chimmi vialte hi lih ka chim lo.  Pathian tu nih kan theihpiak sehlaw, Ka harnak vialte hi zaangfahte in an theih khawh nakhnga atu hi ka chimmi a si. Kai lawmtuk! tiah Malaysia um Kan Chinmi, kan pu,kan pa a simi pakhat nih lungkuai ngaihchia ngai in mitthli he a chim.

 

Chin TV : Atu bia ka halmi hi 2013 ah UNHCR Card a ngahmi a si. Ka nu a hmasa bik ah nangmah na min le na phak kum na ka chim kho hnga maw? Cun zeitik hrawng ah dah na UN Card an in chuh?

Tarnu bia : 2010 ah a rak phanmi ka si. Ka UN Card hi 2017, December 06 ah an ka chuh.

Chin TV : Mah cu an in chuh ruangah zeital an chimmi an um maw? Na ram ah na tlung kho ti tal an chim maw?

Tarnu bia :  Aw!.. Ram a ttha cang, nan tlung kho cang an ti i hei tlung hmanh usihlaw, inn le lo zong kan ngei ti fawn lo i kanmah le nuhmei te kan si fawn. Ka fale a damlo peng fawn. 2016 in a damlo i sizung ah kan um i hi ka zong ah mi bawmhcopte in eimi kan si. Biachim kho loin saupi a um………  Kan inn zong ah kan um ngam lo.. Khawmh kan duh zong ah kan i khawm ngam lo. Inntang ah thilcawk ding zong in kan chuak ngam lo UN Card kan ngeih lo tikah ningttih le thinphang in kan um peng. Ka fanu le rian a ttuan kho lo. Kei zong minau ka um. Mi nau-um in ei a kawlmi kan si. Cu ruang ah Malaysia kan um chung ahhin thinphang in kan um peng, zaan zong ah kan i hngilh kho lo. UN ah le nan tlung kho, nan ram a ttha cang an ti. Khua lei ah le inn le lo zeihmanh kan ngei ti fawn lo. Tlunnak zong kan ngei lo. Kan harsa tuk i zeitindah kan um ne lai ti lawng kan ruat.

Chin TV: Si le, ttuanvo ngeitu pakhat khi tong kho law, UN lubik khi ti, zeidah na hei hal hnga.

Tarnu bia : Kan harsatnak kong hi ka chim lai.

Chin TV; Na tlung kho timi hi teh zeitin na leh lai?

Tarnu bia : Kan tlung kho lo. Office zong ah, Chungkhar cazin zong kan ngei lo. Zeihmanh kan ngei lo, Inn le lo zong kan ngei lo kan ti i nan tlung kho nan ram a si an ti zong ah kan tlung kho hlei lai lo. Tlunnak zong kan ngei lo tiin a chim.

Chin TV: Hi TV a zohtu Laimi sin ah zeidah chim na duhmi a si?

Tarnu bia : ……………….um……. Kan Laimi pawl tal nih hi bantuk kan tonmi tal hi kan theihpi ve hna seh ti ka duh. A ho paoh nih Malaysia um Laimi kan harsatning hi kan theihpi hna sehlaw ti ka duh.

Chin TV: Kan I lawm! Online zohtu nan zate tu kan i ruahmi hi atu Malaysia ah a cang cuahmah mi a si ruang ah nan ngeihchiah, nan chawva le nan thlacamnak le a lamkip in bawmhchanh le ruahpi dingin kan in sawm hna.

 

Note: A tu ka ttialmi an chimning bak in ka ttial khawh lomi tampi a um. A ruang cu an aw a fiang deuh lomi zong a um len. An chim duh deuhnak in ka ttialmi a si i palhnak a um sual ahcun careltu ngeihthiam kan hal hna.

 

By; Stalin Tha Cung Lian