Hamas Ralhrang Pawl Cu Fak Chin Lengmang Kan Phomh Hna Lai- PM Benjamin

Israeli Prime Minister Benjamin Netanyahu nih Gaza in rocket hmangin Palestinian pawl nih Israel ram lei an rak tawnmi cu anmah nak fak deuh in pehzulh in tein kan phomh peng hna lai tiah a chim. Israeli Air Strike ruangah Pathian ni ahkhan Palestinian minung 3 an nunnak an liam. Palestinian lei zong nih Israel khuapi Tel Aviv lei ah rocket ngol hngal loin an kah ve. Vawleicung ram kip nih nan buainak hi ngol cang ulaw, remdaihnak ser cang uh tiah nawlnak an chuah cio. Niruk ni ahkhan US President Joe Biden nih Israel PM Netanyahu le Palestine President Mahmoud Abbas hna cu phone in a chonh hna.

 

Kan hnuzarh nikhat ni thok in tutiang tukdohnak ahhin a tlawm bik Gaza lei in minung 148 an thi cang tiah Palestinian Official pawl nih an chim. Israel lei minung 10 an nunnak a liam cang. Gaza lei i a tam deuh a thimi hna hi Hamas ralhrang pawl an si tiah an chim. Palestinian Health Official lei nihcun a thimi chung ah minung 41 cu hngakchia an si tiah a phuan. Israel Prime Minister Benjamin Netanyahu nih” A herh chung paoh” tukdohnak hi kan pehzulh lai” mipi hna hi hliam an tuarlonak dingah a si khawh chungin kan izuam lai tiah a chim. “Tutan kan buainak ah mawhphurtu kan si lo, an kan doh hmasa caah a si”tiin Netanyahu nih a chim.

 

Tutan buainak nisarih chung bak a umnak hi Kan hnuzarh i East Jerusalem ah Israeli-Palestinian kar I buainak a chuak ruangah a hrinmi a si. Muslim le Jews hna nih hmun thianghlim ah an ruahmi hmun in idohnak hi a chuak hmasa. East Jerusalem ah Temple Mount buainak ah Israel ihnukdok dingin Hamas nih an hrocer hna hnu ah Rocket in an kah chap hna. Cuti cun buainak hi a hun ithok. Kan hnuzarh niruk ni ahkhan Israel  raltuknak vanlong nih Gaza ah High-rise building media organization the Asscociated Press le Al-Jazeera pin ah Office le Appartment tampi umnak cu a hrawh hna. A hrawh dih hnu ah Israel nih cathanh chuah in hi building chung ahhin Hamas  pawl nih Military Asset biapi taktak pawl an chiah hna tiin a chim.

 

UN Secretary General Antonio Guterres nih building hrawh a si mi kong ah fakpi in bia c him. “Secretary-General nih civilian le media pawl he ai pehtlaimi pawl target in thil tuah cu international law kalh a si, zei bantuk lam a si hmanh ah a hrial awk a si tiah a chim. Associated Press (AP) nihcun an umnak building cu Israel ralkap pawl nih hrawh an timhnak kong an chimh hna nak le a chung ummi an zamter dih hnu ah suimilam tlawmpal an hrawh tiah a chim. News organisation CEO, Gary Pruitt nihcun, “Nunnak tampi an liam lai kan phang caah kan chimh hna nak a si” a ti. AP jounralist le freelancer tampi an  um lio a si nain a caan te ah an chuak manh viar’ tiah a chim.

 

US President  Biden phone call- US President Biden nih Prime Minister Netanyahu sinah Israel nih mah ivennak diknak an ngeih cu a thlawp hna kong a chim. Tower Block hrawh a si hnu ah nunnak tampi a liam mi kong cu a poi a tinak chim in Journalist pawl humhim dingin a nawl hna. Biden nih President a si hnu ah a voikhatnak Mahmoud Abbas zong chawn in US-Palestinian  kar pehtlaihnak cu fek deuh in ser  a huamnak kong a chim. Hamas-pawl nihcun rocket hmangin  Israel an kahnak cu an ngol colh a hau tiah a chimh fawn. President Abbas hi West bank um hmun a khuarmi a si Hamas kong ah nawl a ngeituk lem lo. Nain US nih tapung pawl bantuk ah a ruahmi asi. Hamas pawl cu a chon bal hna lai lo.

 

Hamas le Palestinian militant group dang  hna nih ni tlawmte chungah Israel lei ah rocket 2,000 renglo an kah cang. Asinain hi rocket lakah 90% hrawng cu Isarael Iron Dome defence system nih nih a rak kahthlak hna” tiah Israeli military  nih an chim. Iron Dome hi short-range rocket le missile hna lakin ivennak caah special in sermi a si. Kum 2006 ah Israel le Lebanon le Hezbollah pawl idohnak ahkhan Israel ramchung ah rocket thong tam taktak an rak kah. Cu ahcun Israel nih harsatnak tampi an rak tong..  Cu ahcun Israel nih missile defence system thar kan ser lai tiah a rak chim.

 

Israeli firms Rafael Advanced Defense Systems le Israel Aerospace Industries-hna nihcun US bawmhnak in Iron Dome hi an ser colh. Kum 2011 ahkhan hman khawh a si colh. All-weather system  a si i chun le zan zong ah hman khawh viar a si. Gaza lei in rocket kahmi pawl a rak khamtu le a rak hrawktu a si. Iron Dome an sernak ahhin phaisa an hmanmi a tam taktak. Nain, Technology  tampi a ken chih ruangah thil a hrawktu ding missile le a hrawk lotu ding missile tiangin a thleidan khawh. Ttihnung ah a ruahmi paoh cu a kahthlak thluahmah hna. Cu lawng si loin minung umnak ah a tla lo ding missile zong a theih i kahthla loin a um.

 

Iron Dome hi hman khawh a si hnu in Israel nih a ram chung hmun kip ah 10 Battery a chiah hna. Battery kip ahhin launcher pathum maw pali a ken chih i Interceptor missile 20 an kah thlak khawh hna. “Iron Dome System hi um hlah sehlaw, Israel ram ah mithi an tamtuk cang hna. Nunnak chanhchuahtu a biapi taktka mi a si” tiin Israeli Military spokesman Lt Col Jonathan Conricus nih a chim. Hi lio ahhin Analyst pawl nihcun Gaza in rocket uar taktak an rak kahnak a chan hi Palestinian Militant hna nih Iron Dome ca zong ah buaithlak seh tiin an rak chuahmi a si tiin an chim.

 

Tuzing Monday (May 17th) zing ceu hlan ahkhan Israel nih Palestine Hamas pawl an umnak ah Airstrike voi hnih thum nak tam a ngei tthan. Gaza Health Officials pawl nihcun Israel Jet Fighter bombardment ahhin minung 197 an thi cang tiah report an chuah. Hi lio ahin tuzing tthiam ahkhan Hamas pawl nih Israel ah Beersheba le Ashkelon ah rocket an kah tthup ve. An kar boruak hi daih lei a panh kho lo.